Erosjon på Tverrfjellet

Glasialt landskap er erodert av brear og har avrunda former. Typiske landformer er botnar, morenar, ryggar, haugar og u-dalar. Når du ser landskap med flyttblokkar, daudisgroper, skuringsstriper eller drumliner, er det landskap som er forma av bre.

Morene

Morene er usorterte lausmassar som brear har erodert, transportert og avsett. Du finn ofte store og små blokkar i morenemateriale i Tverrfjellsområdet. Dei større steinane er ofte kantrunda. Materiale som er avsett ved bresåla er bunnmorene. Overflata er ujamn og småkupert, og jorda er ofte godt pakka og hard. Dette er typisk for området der det tynne og grove morenedekket er rikt på store stein og blokkar på grunn av harde bergartar som gneis og granitt. Skjellflye er det området med slakast terreng og strekker seg frå den vestlege munninga av  Grjotådalen i sørvest, til dei vestlege skråningane av Halvorshø og Gjuvkampen i nord. Her dominerar morene som lausmassedekke.

Ablasjonsmorenar

Ablasjonsmorenar, eller avsmeltingsmorenar, dannast når materiale som har vore transportert oppå, inni eller i såla av isen, vert avsett når isen smeltar ned. Dette gjev ofte eit kaotisk landskap med fleire haugar og ryggar som ligg fordelt tilfeldig på overflata. Ablasjonsmorenar finst spesielt i  området Gjuvdalen aust for Halvorshø og nord for Gjuvkampen og Tverrfjellstoppen.

Sirkulære ablasjonsmorenar

Ablasjonsmorene på Skjellflye

Desse kan vere nærast perfekt runde eller vere avlange og ovale i form. Ablasjonsmorenar er ofte avsett i blokkmark. Dei er danna av materiale som er frakta av bre oppå ein anna bre, og seinare smelta ned. Du kan sjå fleire av dei i Grjotådalen under Hestdalshøgda.

Mindre haugar og ryggar

Det er mange haugar og ryggar på det slakare partiet på Skjellflye og Tverrfjellsflye. Dei er truleg danna på liknande måte som ein ablasjonsmorene, men dei har ein meir grusig og sandig karakter. Dette kan være indikasjon på at dei er avsett i rennande vatn ved isavsmeltinga, kor dei meir finkorna sedimenta har vorte transportert vidare ned mot Ottadalen.

Like ovanfor Flækøyhø ligg derimot ein litt spesiell haugform som ser ut som haugformene på Skjellflye, berre at denne har tydelig lagdeling av finare sediment. Her er finst særs finkorna materiale, omtrent som kvabb. Det fine materialet kan ha vorte avsett i roleg vatn bak ei mellombels oppdemning av is eller morenemateriale. Ei anna forklaring kan vere at forma har blitt avsett lagdelt inni breisen og der laga har heldt seg intakt ved sakte nedsmelting av is.

Nord på Skjellflye finst ein hesteskoforma haugform som demmer opp eit lite tjønn. Forma har same materiale som resten av rygg- og haugformene på Skjellflye, men har denne karakteristiske hesteskoforma sett ovanfrå.

Drumliner

Drumlines på Skjellflye

Drumliner er avrunda og avlange åsar i retning med tidlegare isbevegelse. Materialet er usortert morene, men kan også vere avsett rundt ei bergkjerne. Du finn fleire drumliner der stigen går opp frå Tundradalen til Skjellflye og vidare mot Skjellsetra.

Flutings

Du finn mange flutings i landskapet nedanfor Grjotåbreen. Dette er sedimentryggar som kan være frå nokre få meter til centimeter i høge og breie, og  som følgjer tidlegare isbevegelse. Du finn dei ofte i grupper ved sida av kvarandre og dei er vanlege i nyleg avdekka breforland. Desse formane har låg haldbarheit og eroderast relativt raskt ned etter dei blir avsette.

Flyttblokker

Når is har frakta blokker frå den staden dei ble plukka laus av berget, blir dei kalla flyttblokker. Du finn mange flyttblokker i lågare områder og dei blir færre med høgda. Dei høgaste flyttblokkene finn du heilt opp til 1920 meter over havet, aust for toppen på Hestdalshøgda. Dette tyder på at innlandsisen har dekka heile Tverrfjellsområdet.

Spylerenner

Du finn mange spylerenner på nordre og indre del av Skjellflye mot Lindheimslågå. Spylerenner blir uterodert i bunnmorene, blokkmark eller fast fjell og følgjer hellinga til ei isoverflate. Spylerennene er samla og går parallelt i seriar nordaustover. 

Rundsva

Rundsva er bergknabbar som er skurt av isbre på støtsida og plukka på lesida. Støtsida blir avrunda og lesida blir meir ujamn. Du finn rundsva nord for Grjotåe i Grjotådalen. Dei har støtsida vendt mot aust, noko som tyder på isbevegelse oppover dalen mot vest.